singkog

nagdadalagan ka na naman na daing tunong

garing awto

sa katahawan nin kalsadang aspaltado-

halaba,

halawig.

an saimung padudumanan-

sain?

masain ka?

duman sa dai nn nakakamidbid saimo?

tibaad ika mawara

sa madiklom na siudad.

an mga harong daa duman

arug sa trentang puon nin niyog

an langkaw.

makatakot.

pero may mina nin bulawan daa

duman sa mansyon kan mga naghahadok sa telepono

minsan matanga.

pangako iyan duman.

saro ka man sa mga nagsusugal.

maghiling ka sana ugaring sa babalyuhan mo-

sa tutungtungan mo-

tibaad an sensilyo sa kalsada

makasingkog.

*para sa mga nagsisikap

*para sa mga pangaturugan nin gimata

*para sa mga turog asin nagtuturugturugan.